Talking about Sahir Ludhinavi's book "TalkhiyaaN" I still have this one memorized

Raat sunssan thi, bojhal thi fiza ki saansaiN
Rooh par chaye thai benaam ghamoN ke saaye
Dil ko yeh zid thi tu aaye tasalli dene
Meri koshish thi kambakht ko neend aa jaye

Der Tuk aankhoN meiN chubhti rahi taaroN ki chamak
Der tuk zehen sulagta raha tanhaii meiN
Par apne Thukraye huwe dost ki parastish ke liye
Tu naah aayi uss raat ki oehnayi meiN

Yun achanak teri awaaz kahin dur se aayi
Jis tarah parbat ka jigar cheer ke koi jharna phooTe
ya zaminoN ki mohabbat meiN taRap kar naagaah
AasmanoN se koi shokh sitara Toote

Shehed sa ghul gaya talkh - e baye tanhai meiN
Rang sa phail gaya dil ke siyaah khanay meiN
Der tuk yuN teri mastana sadayaiN goonjti rahiN
Jis tarah phool chaTakne lagaiN weerane meiN

Tu dur kisi anjuman e naaz meiN thi
Phir bhi yeh mehsoos kiya keh tu aayi hai
Aur apni awaz mein chupa kar
Meri khoyi huwi neendoN ko mana laayi hai

Ab agar yehi hai manzoor tujhe to ai jaan e qaraar
Mein raah nah dekhunga siyaah raatoN meiN
Dhoond lengi meri tarsi huwi nigahain tujh ko
Naghma o sher ki umanDti huwi barsaatoN meiN

Ab tera pyar satayega to meri hasti
Teri masti bhari awaaz meiN Dhal jayegi
Aur yeh rooh jo bechen si hai
Geet bun kar tere hontoN pe machal jayegi