Kuch cheezaiN yuN banti haiN keh jin ko CLASSIC kaha jata hai.

Jo lajawab hoti haiN. Bai misasl. Jin ka koi saani nahiN hota. Masterpiece - Shahkaar.

Aisi cheezaiN phir amar ho jati haiN. Hamesha zinda rehti haiN.

Aisa he ek Pakistani gana hai, bohot purana. Taqreeban 40 saal ya uss se bhi purana. Shayad aap meiN se kuch logoN ne suna bhi ho.

Film shayad WAADA ka hai. Sharafat Ali ne yeh ek he gana gaya hai aur yeh super hit huwa. Uss ke bohot baad PTV ke program Silver Jubilee mein ek amateur singer, Abdul Wahab ne issi gaanay ko ek naye andaz se baRi khoobsurti se gaya. Aur phir aaj mein ne yehi gana ek music site par Masroor Hussain ki awaaz meiN suna


Dil bhi karta hai yaad chup ke tujhe
Naam leti nahiN zabaaN tera
Kis se poochuNga meiN khabar Teri
Kaun batlayega nishaN tera

Teri ruswaiyoN se darta huN
Jub tere sheher se guzarta huN

Haal e dil bhi nah keh saka garcheh
Tu rahi mudattoN qareeb mere
Tu mujhe choRh kar chali bhi gayi
Khair qismat meri naseeb mere

Ab mein kyuN tujh ko yaad karta huN
Jub tere sheher se guzarta huN

Woh zamana Teri mohabbat ka
Ek bhooli huwi kahani hai
Kis tamanna se tujh ko chaaha tha
Kis mohabbat se haar maani hai

Apni qismat pe naaz karta huN
Jub tere sheher se guzarta huN

Koi pursaan e haal ho tou kahuN
Kaisi aandhi chali hai tere baad
Din guzara hai kis tarah meiN ne
Raat kaise dhali hai tere baad

Roz jeeta huN roz marta huN
Jub tere sheher se guzarta huN

Woh jo kehte thay mujh ko deewana
MeiN unhaiN bhi bura nahiN kehta
Warna ek bay nawa mohabbat meiN
Dil ke luTne pe kya nahiN kehta

MeiN to mushkil se aah bharta huN
Jub tere sheher se guzarta huN.....