Woh khidhki....jo dil kay aangan say khulti thi, dur...kisi andekhay jazeeray ki janib....ek maanoos ajnabi jehan mein....

Nahin. Yeh khwaab nahin. Khyal bhi nahin. Soch bhi nahin. Shayad yeh ek ehsas hai...issi liye likha "dil kay aangan say".

Wahan ya to sunehri dhoop hoti ya madham chandni. Badal hotay, sitare hotay, os kay qatray hotay aur kabhi barish ki nanhi nanhi boondain. Fiza mein ek khushbu hoti...ek dilawaiz khushbu - sirf mitti ki soondhi soondhi khushbu. Akash par parinday hotay, bohot saray parinday...sirf safed parinday jo apni lambi gardan uthaye, par phelaye, un ko halki jumbish detay huwe, dheeray dheeray apne safar mein rawan rehtay. Zindagi jaise theher see jati. Shayad qarar aur sakun issi ko kehtay hongay.

Wahan mujhe siyah raaton mein teri raah nahi dekhni parhti. Wahan taaron ki chamak aankhon mein nah chubh paati. Wahan zehen tanhai mein nah sulagta, uss jazeeray par.

Phir mein nay ghaur say dekha un safed parindo ko aur un parindo ki udhan ko. Shayad un ka apni manzil ki janib rawan rehna he un ki manzil hai, mein nay socha.

Mujhe yeh sher yaad aya:
"Dunya jise kehtay hain
Jadu ka khilona hai
Mil jaye to mitti hai
Kho jaye to sona hai"

Aur....mein nay.....woh khidhki bund kar di................................. ........

Mumkin hai keh waqt ke sath sath meri hasti issi kahani mein dhul jaye. Mumkin hai keh yeh kahani, hawa ke dosh par sawar, maujon ki rawani mein sawar, ussi jazeeray par ja pauhnchay. Mumkin hai kisi din tum bhi uss jazeeray say guzro....Mumkin hai keh yeh kahani, geet bun kar tumhare honton par machal jaye...Mumkin hai....

-Me~~~tariq