Agar kabhi meri yaad aaye
Tou chand raatoN ki dilgeer roshni meiN
Kisi sitare ko dekh lena
Agar woh nakhl-efalak se urh kar tumhare qadmoN meiN aa giray to yeh jaan lena
Woh isteaara tha mere dil ka
Agar nah aaye?....

Magar yeh mumkin he kis tarah hai keh kisi par nigaah daalo
Tou uss ki deewar-e-jaan nah toote
Woh apni hasti nah bhool jaye !
Agar kabhi meri yaad aaye
Gurez karti hawa ki lehroN pe hath rakhna
MeiN khushbouN meiN tumhaiN milunga
Mujhe gulaaboN ki pattiyoN meiN talash karna
MeiN ous qatroN ke ayeene meiN tumhaiN milunga
Nah paawo mujh ko
Tou apne qadmoN meiN dekh lena
MeiN gard hoti musafatoN meiN tumhaiN milunga
KahiN pe roshan chiragh dekho to jaan lena
Keh har pattangay ke sath meiN bhi sulag chuka huN
Tum apne hathoN se inn pattongoN ki khaak darya meiN daal dena
Mein khaak bun ke samandar meiN safar karunga
Kisi nah dekhe huwe jazeere pe ruk ke tumhaiN sadayaiN dounga
SamandaroN ke safar pe niklo
Tou iss jazeere pe kabhi utarna

_Amjad Islam Amjad